.png)
Komisioni i ngritur nga Ministria e Arsimit e Shqipërisë si pjesë e marrëveshjes së nënshkruar me Greqinë në 2018 për ndryshimin e teksteve shkollore do të mblidhet në javët në vazhdim për të bërë një bilanc të punës së kryer deri më tani.
Lajmi është dhënë tërthorazi nga ana e Komisionit Europian gjatë kthimit të përgjigjes ndaj eurodeputetit grek, Manolis Kefalogiannis. KE thotë se është informuar se grupi i ekspertëve të ngritur nga autoritetet shqiptare për rishikimin e këtyre teksteve do të raportojë në javët në vazhdim për punën e bërë deri më tani.
“Komisioni Europian është në dijeni të detyrave që i janë ngarkuar komisionit të përbashkët të ekspertëve shqiptaro-grekë për rishikimin e teskteve shkollore, si pjesë e marrëveshjes së arritur në 2018-ën dhe bazuar në kriteret e vendosura nga Këshilli i Europës”, thuhet në deklaratën e KE.
Greqia akuzon Shqipërinë se nuk po zbaton një marrëveshje për ndryshimin e teksteve në librat e gjeografisë dhe të historisë, duke vazhduar të kultivojë, sipas Athinës “irredentizëm”. Shqetësimi është ngritur deri në Komisionin Europian nga eurodeputeti grek i “Demokracisë së Re”, Manolis Kefalogiannis.
Eurodeputeti grek thotë se palët ranë dakord që të hiqnin nga librat e gjeografisë dhe të historisë referenca që lidhen me “territoret shqiptare në Greqi”, përfshirë këtu edhe ilustrimet, si harta, foto e të tjera.
“Sipas autoriteteve të Bashkimit Europian, kjo kërkesë themelore do të forconte marrëdhëniet e fqinjësisë së mirë dhe të siguronte që fëmijët dhe të rinjtë shqiptarë të mos keqinformohen”, thotë eurodeputeti grek.
Sipas eurodeputetit të “Demokracisë së Re”, ndryshimet në librat e historisë dhe gjeografisë duhet të hynin në fuqi në shtator të 2019. Ai thotë se deri më tani nuk ka asnjë zhvillim për këtë temë dhe akuzon palën shqiptare se ka refuzuar vazhdimisht kërkesat për informacion mbi këtë çështje nga ana e Athinës.
Kefalogiannis i kërkon Komisionit që të ndërmarra hapa të nevojshme për t’u siguruar që Shqipëria të përmbushë zotimet e saj dhe të heqë nga librat, sipas tij, “tendencat irredentiste kundrejt një vendi anëtar të Bashkimit Europian”.
Shqetësimi i Athinës lidhet kryesisht me përdorimin e terminologjisë, komenteve dhe përcaktimeve gjeografike e territoriale të Çamërisë në librat e historisë dhe të gjeografisë shqiptare dhe kërkon prej vitesh ndryshimin e këtyre teksteve.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
