.png)
Nga Gazeta Si- Kanceri i gjirit është kanceri më i zakonshëm i diagnostikuar globalisht dhe një nga shkaqet kryesore të vdekjeve nga kanceri tek gratë.
Në Shqipëri, kanceri i gjirit përbën rreth 11 për qind e të gjitha rasteve të reja të kancerit çdo vit, duke zënë vendin e parë për risk individual te gratë.
Sipas raportit të fundit në ISHP, aktualisht, vlerësohet se në vend jetojnë rreth 5,000 gra me kancer gjiri, ku vetëm në vitin 2024 u diagnostikuan 805 raste të reja te femrat dhe 14 te meshkujt.
Nga viti 2015 deri në vitin 2024, incidenca ka pësuar një rritje prej 23%, me një rritje mesatare vjetore prej 2.1%.
Rreziku i diagnostikimit rritet ndjeshëm me moshën, duke arritur kulmin në grupmoshën 50–70 vjeç. Analizat tregojnë se rritja e përgjithshme e incidencës shpjegohet kryesisht nga rastet mbi 50 vjeç, të cilat janë shtuar me 3.6% mesatarisht çdo vit, ndërsa tek moshat nën 50 vjeç është vërejtur një ulje mesatare prej 1.9% në vit.
Mosha mediane në momentin e diagnozës është rritur nga 55 vjeç në vitin 2015 në pothuaj 59 vjeç në vitin 2024.
Bashkë me rastet është rritur edhe numri i mamografive në Shqipëri, nga rreth 5 mijë në vitin 2014 në mbi 25 mijë gjatë viteve 2022–2024.
Në botë, cdo vit raportohen mbi 2.3 milion raste të reja dhe rreth 666 mijë vdekje, duke e renditur kancerin e gjirit në vendin e dytë për nga incidenca pas kancerit të mushkërive dhe në vendin e katërt për nga vdekshmëria.
Europa, ndonëse përfaqëson vetëm 9% të popullsisë botërore, mban një peshë disproporcionale me mbi një të katërtën e rasteve dhe mbi një të pestën e vdekjeve nga ky kancer.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
