Rumania ka regjistruar rastet e para të konfirmuara të lebrës në më shumë se 40 vjet.
Shteti i Bashkimit Europian tha se kishte gjetur dy masazhatore me sëmundjen në një qendër spa në qytetin veriperëndimor të Kluzhit.
Të dyja janë indoneziane të moshës 21 dhe 25 vjeç.
Ministri i Shëndetësisë Alexandru Rogobete tha se klientët në qendrën e spa-s nuk duhet të shqetësohen, pasi sëmundja kërkon ekspozim të zgjatur për t’u transmetuar.
Rasti i fundit i konfirmuar i lebrës në Rumani, e njohur edhe si sëmundja e Hansenit, u zbulua 44 vjet më parë, tha ministria.
Kroacia ka konfirmuar gjithashtu një rast të izoluar të lebrës, i pari në më shumë se 30 vjet. Rasti i fundit në vendin ballkanik daton që nga viti 1993, ndërsa afërsisht 20 raste ishin regjistruar gjatë gjithë shekullit të 20-të. Bernard Kaic, kreu i Shërbimit për Epidemiologjinë e Sëmundjeve Infektive në Institutin Kroat të Shëndetit Publik, shpjegoi se pacienti u paraqit në shërbimin epidemiologjik në Split rreth dhjetë ditë më parë me simptoma që përputhen me sëmundjen.
“Rasti u identifikua menjëherë,” deklaroi Kaic, duke specifikuar se “personi aktualisht po i nënshtrohet trajtimit, ndërsa kontaktet e ngushta kanë marrë terapi parandaluese pas ekspozimit, megjithëse nuk janë gjetur të infektuar”. Pacienti është një punëtor i huaj me origjinë nga Nepali i cili jeton në Kroaci me familjen e tij.
Lebra, e njohur edhe si sëmundja e Hansenit, është një sëmundje kronike infektive e shkaktuar nga një bakter që transmetohet kryesisht përmes pikave të frymëmarrjes të lëshuara nga kolla ose teshtima. Megjithatë, transmetimi ndodh vetëm përmes kontaktit të zgjatur me një person të infektuar, duke e bërë sëmundjen shumë më pak ngjitëse sesa sëmundjet e tjera të frymëmarrjes.
Sëmundja manifestohet me lezione të lëkurës dhe dëmtime të nervave periferikë, të cilat shkaktojnë humbje të ndjeshmërisë dhe një ndjenjë dobësie të përgjithshme. Megjithatë, lebra tani është plotësisht e shërueshme. Trajtimi kërkon gjashtë deri në 12 muaj terapi.
Rishfaqja e lebrës në Europë nuk duhet të jetë shumë e habitshme, duke pasur parasysh vetë natyrën e sëmundjes. Sëmundja e Hansenit ka një periudhë inkubacioni jashtëzakonisht të gjatë: nga infeksioni deri në shfaqjen e simptomave të para, mund të kalojnë nga gjashtë muaj deri në dhjetë vjet, ndonjëherë edhe më gjatë. Kjo e bën praktikisht të pamundur zbulimin e sëmundjes përmes kontrolleve standarde shëndetësore tek njerëzit që vijnë nga vendet ku lebra është ende endemike.
Aktualisht, sipas të dhënave nga Organizata Botërore e Shëndetësisë, lebra mbetet endemike në pesë zona kryesore të botës: disa rajone të Brazilit, Indisë, Indonezisë, Republikës Demokratike të Kongos, Bangladeshit dhe vendeve fqinje. Lëvizshmëria e lartë dhe në rritje ndërkombëtare dhe flukset e forta të migrimit kanë çuar në raste sporadike edhe në vendet ku sëmundja konsiderohej e zhdukur.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
