.png)
Nga Gazeta Si- Policia ka arrestuar edhe Valbona Ramën, nënën e 26-vjeçares Ermalinda Rama, e cila mbyti babain e saj Anesti Rama me tel, në fshatin Frashër të Fierit.
Pas vrasjes, së bashku me të ëmën, kanë tentuar që të fshihnin ngjarjen duke pastruar trupin e 56-vjeçarit dhe me qëllim inskenimin si aksidentale. Pasi kanë pastruar trupin dhe e kanë veshur, vajza ka telefonuar policinë, duke pretenduar se babai kishte humbur jetën pasi ishte rrëzuar në banjo.
Por, pas kryerjes së veprimeve të para hetimore, u krijuan dyshimet se 56-vjeçari nuk kishte humbur jetën aksidentalisht, pasi policia vuri re se kishte mavijosje në qafë.
Ajo ka pranuar më pas krimin në polici, duke treguar se i ati ishte fanatik dhe se nuk e linte që të vishej si donte apo të argëtohej. 26-vjeçarja i ka thënë grupit hetimor se 56-vjeçari i ushtronte presion në përditshmërinë e saj dhe se kishte debate të shpeshta me të atin pasi nuk i jepte para kur ajo i kërkonte. Nëna e të resë ka mohuar përfshirjen në ngjarje.
Por nga hetimet ka rezultuar se në dijeni të krimit ishte edhe mamaja e vajzës, e cila gjithashtu tentoi të fshihte ngjarjen.
Familjarët e 56-vjeçarit tregojnë për mediat se ata kanë pasur shpeshherë konflikte. “E kemi ditur dhe më përpara. Nuk shkonin. Ajo thoshte nuk e dua më burrin. E merrni thoshte mbajeni ju, merrni pensionin bëni çfarë të doni.”
Sipas burimeve të Policisë, Anesti Rama dhunohej sistematikisht në familje dhe e bija dhe bashkëshortja e kishin nxjerrë të jetonte në një dhomë jashtë shtëpisë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
