Bankat qendrore më të mëdha në botë do të përfundojnë këtë javë vitin më agresiv për rritjen e normave të interesit në katër dekada, me luftën e tyre kundër inflacionit ende të pa përfunduar edhe pse ekonomitë e tyre janë ngadalësuar.
Rezerva Federale e SHBA-së të mërkurën(14 dhjetor) është vendosur të rrisë normën e saj bazë me 0.5% duke arritur në një interval prej 4.5%, më i larti që nga viti 2007. Dhe do të sinjalizojë më shumë rritje në fillim të vitit 2023.
Një ditë më vonë, Banka Qendrore Europiane dhe Banka e Anglisë ka të ngjarë të ndjekin të njëjtën rritje.
Viti mbyllet shumë më ndryshe se sa ka nisur.
Në janar, shumica e politikëbërësve po e pranonin se kishin gabuar që kishin vënë bast se rritja e inflacionit të vitit 2021 do të zbehej së shpejti, por gjithsesi supozuan se ata mund të frenonin çmimet me një shtrëngim të qëndrueshëm të politikës.
Në vend të kësaj, të dhënat tregojnë se si një përshpejtim i inflacionit global në shifra dyshifrore i detyroi ata të shtrydhin fort:
Janë vërejtur rreth 275 rritje të interesit këtë vit, gati një për çdo ditë tregtimi. Më shumë se 50 banka qendrore kanë ekzekutuar një herë të rrallë rritje prej 0.75%, disa duke iu bashkuar Fed-it për ta bërë këtë në mënyrë të përsëritur.
Edhe pse po shtohen shenjat se inflacioni ka arritur kulmin në shumicën e vendeve, pyetja kryesore tani është se çfarë ndodh në 2023.
Rasti më i keq është se inflacioni rezulton kokëfortë dhe fillojnë recesionet, duke krijuar një makth stagflacioni për bankat qendrore. Shpresa më e mirë është që rritja e çmimeve të konsumit të tërhiqet mjaft shpejt për t’u mundësuar politikëbërësve të ndalojnë rritjen e normave dhe të konsiderojnë uljen e tyre për të nxitur rritjen.
Ndërsa shumë investitorë presin një kthesë, kryetari i Fed-it, Jerome Powell dhe presidentja e BQE-së, Christine Lagarde, të cilët do të flasin këtë javë, thonë se fokusi i tyre mbetet në trajtimin e inflacionit edhe nëse kjo gjë dëmton kërkesën dhe punësimin.
Burimi: Bloomberg; Përshtati Gazeta Si
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
