Nga Gazeta 'SI' - Pa përplasje, seanca plenare e kësaj të hëne u shoqërua me trazira të lehta.
Opozita vijoi mosbindjen civile me akte më të zbutura, duke lejuar fjalimet, por jo foltoren, ndërsa socialistët duket se u gjetën të papërgatitur duke mbyllur punimet në 20 minuta..
Pas një muaji demokratët morën vendimin për të mos bllokuar seancën plenare dhe u paraqitën me pankarta në duar e me moton “Lironi Berishën”, ata bllokuan foltoren, por jo mikrofonat.
Në seancë ishin regjistruar për të folur 7 deputetë, mes të cilëve edhe dy opozitarë, Vangjel Dule dhe Dashamir Shehi, por përballë një foltoreje të bllokuar dhe një zhurmuesi të ndezur, preferuan të kalonin radhën.
Fjalimet e socialistëve ishin pa axhendë, duke ngritur shqetësime të ndryshme, që nga indeksimi i pensioneve deri tek ligji për mbrojtjen e shëndetit nga produktet e duhanit. E teksa socialistët flisnin, demokratët dëgjonin.
20 minuta mjaftuan për t’i dhënë fund kësaj seance plenare, ndërsa demokratën preferuan mikrofonat e mediave sesa ato të Parlamentit për të dhënë qëndrimin e tyre.
Seanca e radhës është të enjten, por deri atëherë demokratët kanë një aksion për të bllokuar akset rrugore të martën pasdite, veprim i cili duket se ka marrë fokusin e tyre.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.