.png)
Një foto e sotme, e krahasuar me një të 2009-ës: trendi më i ri i rrjeteve sociale, që tashmë është bërë viral brenda pak orësh dhe ka pushtuar edhe sportistët e njohur. “10 years challenge” është sfida më e re. Krahasimi i dy fotove të shkrepura në 10 vjet distancë tregon ndryshimet në pamjen e personave të njohur dhe sportistët nuk mund të qëndronin pasivë.
Mes shumë futbollistësh që janë prekur nga ky trend, janë dy simbole të Juventusit dhe të Italisë, Xhanluixhi Bufon dhe Xhorxhio Kielini. Portieri ka zgjedhur një foto me kombëtaren italiane, por me ngjyrë të kuqe, dhe një foto aktuale me PSG-në.
Kurse mbrojtësi ka postuar me krenari një foto me shiritin e kapitenit të Juventusit dhe një foto të 10 viteve më parë, po me ngjyrat bardhezi.
Nuk mund të mungonin në apel dy specialistë të rrjeteve sociale, Pol Pogba dhe Nejmar. Pogba ka postuar dy foto me fanellën e Mançester Junajtid, e para me akademinë e këtij klubi dhe e dyta me ekipin aktual.
Nejmar ka postuar në profilin e tij në Instagram dy foto portret, e para në kohën kur ai ishte ende adoleshent te Santosi dhe tjetra me ekipin aktual, PSG-në. Ndryshime ka, por jo shumë të mëdha për brazilianin.
Nga Spanja vijnë tre postime nga një klub, që ka shkruar historinë e 10 viteve të fundit, Barcelona. Klubi katalanas ka zgjedhur mbrojtësin Pike, mesfushorin Buskets dhe sulmuesin Mesi, të cilët festojnë me “manita”.
Por jo vetëm futboll. Nga Spanja vijnë edhe postime nga sportistë të tjerë, nga Rafael Nadal dhe Mark Markez. “Zotëria i tokës së kuqe“, Nadal, shfaqet në dy foto të ndryshme në profilin e tij në Instagram, ku krahasohen sukseset e tij në Roland Garros, në vitet 2008 dhe 2018.
Kampioni i botës në Moto GP, Mark Markez, ka bërë krahasimin mes fotos së podit të parë të tij dhe fotos së festës me shampanjë për fitimin e Botërorit të 2018-ës.
Dhe në fund një foto ironike, që ka protagonistë dyshen Uanda Nara Mauro Ikardi. Bashkëshortja-agjente e kapitenit të Interit shfaqet në foton e parë në krah të ish-bashkëshortit Maksi Lopez dhe në foton e dytë në krah të Mauro Ikardit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
