Kosova ka arritur marrëveshjen e parë direkt me një kompani prodhuese vaksinash anti-Covid jashtë mekanizmit Covax.
Ministria e Shëndetësisë së Kosovës njoftoi se është arritur dakordësia me kompaninë Pfizer për furnizimin e vendit me rreth 1.2 mln vaksina, që synohet të mbërrijnë në vend brenda këtij viti.
Dozat do të mjaftojnë për vaksinimin e 600 mijë qytetarëve të Kosovës, ose rreth një të tretën e popullsisë, ndërkohë që objektivi i vendosur nga Qeveria e Albin Kurtit është që brenda këtij vitit të vaksinojë me të dyja dozat dy të tretat e popullsisë.
Deri më tani Kosova ka përfituar numër relativisht të vogël vaksinash nga mekanizmi Covax dhe në formën e donacioneve nga vende mike. Marrëveshjen me Pfizer e njoftoi Ministria e Shëndetësisë përmes një njoftimi në rrjetet sociale.
“Është arritur marrëveshja me Pfizer për blerjen e 1.213.290 dozave të vaksinës COVID-19. Ky moment shënon hapin më të rëndësishëm për Republikën e Kosovës përballë Covid-19, duke ruajtur shëndetin e qytetarëve dhe sistemin tonë shëndetësor. Ne jemi të vendosur të vazhdojmë me një ritëm të shpejtë, për të arritur vaksinimin e 60% të qytetarëve deri në 2021”, thuhet në deklaratë.
Sa i takon çmimit të blerjes së këtyre dozave dhe kur nis mbërritja e tyre nuk jepen detaje.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
