Mendim

A mund ta ndajmë Yuri Kim nga Departamenti i Shtetit?

Nga Gjon Libohova – Përpara dy javësh, Departamenti i Shtetit i SHBA bëri publik një prej raporteve të tij vjetore. Këtë radhë, ishte ai për Klimën e Investimeve. Gjatë vitit, Departamenti i Shtetit nxjerr një numër raportesh. Është ai për të Drejtat e Njeriut, ai për Lirinë Fetare, ai për Klimën e Investimeve, ai për Trafikimin e Personave, ai për Pastrimin e Parave dhe Trafikun e Narkotikëve. Këto raporte dalin çdo vit dhe në pjesën më të madhe të rasteve, i bën publike vetë Sekretari i Shtetit i SHBA. Raportet janë kërkesë e Kongresit të SHBA për ekzekutivin amerikan dhe çdo vit, ekzekutivi ia paraqet ato Kongresit.

Historikisht, të gjitha këto raporte bëhen lajm në Shqipëri dhe me të drejtë. Shtetet e Bashkuara gëzojnë një autoritet të admirueshëm dhe raportet përbëjnë një lloj skaneri të situatës në një fushë të caktuar në Shqipëri. Reagimet ndaj raporteve janë të shumëllojshme. Dihet që çdo opozitë e merr çdo raport dhe e tund përpara kamerave, hem si akuza për qeverinë e radhës e hem si vërtetim të atyre që thotë vetë. Zakonisht, qeveritë marrin nga raportet ato pjesë që iu interesojnë dhe nxjerrin fjalitë që iu pëlqejnë. Kështu ka ndodhur çdo vit dhe me siguri do të vazhdojë të ndodhë për vite me radhë.

Pasi dalin raportet, fillojnë komentet nëpër editoriale, media sociale, debate televizive që përpiqen të shohin diçka që është e pamendueshme. Persona pranë opozitave – dhe kjo ka ndodhur gjithmonë pavarësisht kush është në qeveri e kush në opozitë – përpiqen t’i tregojnë me gisht këto raporte si tregues që qeveritë që bëjnë raportet e njohin situatën shumë më mirë sesa diplomatët e tyre në vendet përkatëse. Dhe kështu, t’i mëshojnë qëllimeve të opozitave për të kritikuar, për të bërë të pabesueshëm, dhe për të ulur autoritetin e diplomatëve të caktuar në Shqipëri.

Raporti për klimën e investimeve nuk bëri përjashtim. Opozita u turr me vrap të tregonte me gisht gjithë problemet që ngrinte raporti – PPP-të, tenderat, licencat, korrupsionin, etj., etj. Dhe bëri mirë. Problemet janë serioze dhe ndikojnë drejtpërdrejt nivelin e investimeve të huaja. Të njëjtën gjë bëri madje edhe presidenti. E quajti situatën alarmante dhe e përgëzoi raportin. Në fakt, gjatë këtij viti, opozita e pati mundësinë të mbështeste një investim të huaj, amerikan madje. Investimin për dyqanet pa taksa (duty-free) në aeroportin e Rinasit. Investitori amerikan u rropat gjykatave, por nuk ia doli të fitonte ndaj përbindëshit Gjin Gjoni. Opozita dhe presidenti nuk e gjetën një çast që të shprehnin mbështetje për kompaninë ICDF edhe pse këtë shtator e gjetën kohën të tundnin përpara kamerave raportin e DASH. Megjithëse, kur sheh emrin e Gjin Gjonit të përflitet si deputet (diçka e përmendur nga Gjin Gjoni në letrën për KLGJ, jo thjesht thashethem), e kupton heshtjen.

Gjithsesi. Pati komentues që thanë se DASH e njeh situatën, ia tregon vendin qeverisë me raportin, është realist siç tha presidenti, por problem është tek Yuri Kim, se ajo mbështet Edi Ramën, mbështet qeverinë, nuk e kritikon, etj., etj. Në fakt, një analist, shkroi: “Për të marrë vetëm një shembull, mjafton të shohësh raportet e departamentit të shtetit për liritë ekonomike, koncesionet dhe PPP, apo atë që flet për pafuqinë e shtetit për të luftuar bandat kriminale dhe trafikantët e drogës dhe ta krahasosh me atë që diplomatët që varen prej tij thonë në Tiranë. Ndryshimi është kolosal”. [1] Qerratai analist pretendon se diplomatët “rekrutohen” e “blihen”.

Si është e vërteta? Mjafton të shohësh hyrjen në Raportin për Klimën e Investimeve të Departamentit të Shtetit. “Raportet e Departamentit të Shtetit për Klimën e Investimeve ofrojnë informacion specifik për vendet mbi klimën e biznesit për mbi 170 vende dhe ekonomi. Ato përgatiten nga zyrtarët ekonomikë të vendosur në ambasada dhe poste anembanë botës dhe analizojnë një shumëllojshmëri ekonomish që janë ose mund të jenë tregje për bizneset amerikane të të gjitha përmasave.”[2]

Kush i përgatit? Zyrtarët ekonomikë? Pra ambasadat? Pra, ambasada amerikane? Yuri Kim? Po, si kështu? Po ajo është e “rekrutuar” dhe e “blerë” nga qerratai i Tiranës? Me sa duket, jo. Nuk funksionon ashtu. Vulën raportit ia vendos pikërisht Yuri Kim përpara se të shkojë në Washington, edhe pse qerratajtë e Tiranës nuk mendojnë kështu. 


Copyright © Gazeta “Si”



Më Shumë